Was isch de eigetlech Bärndütsch?

"Heit Der scho einisch probiert, e chli Bärndütsch z verstah oder z läse?" Heit Der scho einisch pro biert, e chli Bärndütsch z ver stah oder z läse? (Hexameter gfunden im Büechli "Bern für Anfänger, Diogenes Tabu, Zürich 1962)

Berndeutsch ist der beliebteste Schweizer Dialekt

«Bärndütsch git s nid!»

A der Wältusstellig 1992 z Sevilla het ei Satz d Schwyzer erchlüpft: "Suiza no existe = La Suisse n'existe pas!" Was säge-n-o d Bärner, wen ig itz bhoupte "Bärndütsch git s nid!"?

"Was isch de eigetlich Bärndütsch?" - "E tummi Frag, däich das, wo d'Bärner rede!"

Nid im ganze Kanton Bärn redt me "Bärndütsch". Im Jura redt me sogar wältsch. Derfür rede di Reformierte i zwene katholische Nachbarkantön bärndütsch: im solothurnische Buechibärg un im fryburgische Murtepiet. (O im westliche Teu vom Aargau und westliche Teu vom Entlebuch redt me fasch Bärndütsch.) Aber o nid all "Mittel-Bärndütsch-Bärner" zwüsche Thun, Lyss oder Biel u Burtlef oder Langenthal rede glych. Am schönste het dr Jeremias Gotthelf d Unterschid im Bärndütsch beschribe. Es geit um Heuhüüffe:

«Diese Haufen nennt man in den Dörferen Birlig, im Emmental Schöchli. Als nun Stüdeli da oben von seinen Birligen sprach, da horchten die Leute hoch auf, und als sie endlich merkten, was Stüdeli darunter verstehe, da pfupften sie sehr und fanden im höchsten Grade lächerlich, dass man da unten solchen Haufen Birlig sage, es seien ja Schöchli, und wer das nicht wisse, der müsse hingernache der Welt daheim sein. Da ist noch die alte mächtige Rechtgläubigkeit zu Hause, wo man, so wie es nur einen Gott, nur eine Wahrheit gibt, auch nur einen Ausdruck für eine Sache, nur einen Gebrauch, nur eine Sitte kennt und für die allein wahre und seligmachende anerkennt, alle andern als dumm, lächerlich, ketzerisch verlacht und verdammt.»

Dr Fritz Frutiger schrybt über en anderi Sprachgränze im Bärnbiet: "Der Ramisberg bildet noch heute die Sprachgrenze zwischen Unter- und Oberemmental. Es kamen auch Kinder von Grünenmatt in diese Sonntagsschule. Sie sprachen ganz anders als wir vom oberemmentalischen Ranflüh. Es war für mich völlig ungewohnt, diese Kinder sagen zu hören: Hei, heimer, Fleisch, Steine, Laub usw... Richtig schien mir doch: hii, hiimer, Fliisch, Stiine, Luub usw. Noch heute kann ich sagen, in welchen Häusern man damals so und in welchen man anders sprach." (in "Uf Bärnerbode, Jugenderinnerungen von Gotthelf bis Dürrenmatt", herausgegeben von Hans Sommer im Francke Verlag Bern, 1972)

Zum glyche Thema het o dr Fritz Schwarz i syne Erinnerige gschribe.

O i üser Familie git s eso Sache: So seit mi Frou ging, si heig e Schöiben anne, we sie es Fürte treit. D Eltere vo mir Frou si im Aemmital u im Oberaargou ufgwachse (wo me "Schöibe" seit - i kenne das Wort nume n us Bärndütschbüecher) u myner Eltere chömen us dr Wohlegmein, westlech vo Bärn, äbe n us em Fürtegebiet. - We das Fürte (oder die Schöibe) nid us Stoff isch, sy mr is einig: Gester het mi Frou bim Loeb e Plastigschurz wölle choufe.

Das Bärndütsch, wo-n-i hie versueche z schrybe, het me vor 50 Jahr uf dr Sunnsyte vom Wohlesee bi Bärn gredt. I schrybe also nid "Bärnglisch", chönnt ender säge wi dr Christian Schmid "Im Stübli" vom "Bund" (23.9.00): "I ha aus Raadiomacher ds Gfüeu, mi Dialäkt mües eso guet tööne wi nume müglech, guet, gmässen am aute Dialäkt. Aber i bin e Sourier, es Usloufmodäu us ere Wäut, wo zimmli schnäu verschwindet." - Bi üüs am Wohlesee hei mr "Aabe" u nid "Oobe", "schneije" u nid "schnije", "gärn" u nid "gäre", "trinkche" u nid "tryche" gseit. ( I sälber säge aber meistens "Fäister" u "däiche" u nid "Fänster" u "dänkche"). (Alli Forme sy bärndütsch.) Mir säge natürlech ging "Hung", "Miuch" u "Fäischter", o wen-i "Hund", "Milch" u "Fäister" schrybe. U wen-es albe het wölle cho rägne, so hei mr gjuflet oder Birlige gmacht...

Uf der Syte hie zeigen-ig öppis vo däm, wo gstudierti, glehrti Lüt über ds Bärndütsch gschribe hei.

I dr Schwyz ratiburgeret me, gob die chlyne Schüeler Früeänglisch, Früefranzösich oder villech doch Früedütsch sötti leere. Da drzue us emene Artikel vom Schmid Christe:

Mundart: Früe...

"Us em religiööse Wortschatz

«Früeschpraachenungerricht» isch i dr dütsche Schwiz eidütig aus Begriff us em Wortschatz vo dr Religioon vom freie Märit u vo dr Globalisierig ufchoo u schteit daa nid zur Diskusioon. Er isch e Befääu a d Leerchräft vo den Ungerbeliechteten uf dr ganze Wäut, wo nid i dr änglische Schpraach ufwachse, so früe u so guet wi nume müglech Änglisch z leere, das si d Wäutoornig vo de Superriichen u irne Lakaie nid schtööre. Vo daa us gsee isch ds Bekenntnis - i bruuchen äxtraa das religiööse Wort - vo de Wäutsche zum Früedütsche nüüt angersch weder e Häresii, en Irrgloube, u rüeft nach dr Inquisizioon mit em Buschor aus Groossinquisitor. Wär hingäge dr Meinig isch, d Erfüuuig vom Mönschsii sig ganz öppis angersch weder dr heilig Chrieg vom Giz, mues d Fraag vom Früeschpraachenungerricht nid zun ere religiööse Fraag mache. Er cha ds Derfüür u Derwider vo gseuschaftleche, wiirtschaftleche, politischen u pädagoogische Gsichtspünkt diskutiere, wiu di Fraag i dä ganz Raame ghöört."
(Christian Schmid, 03.05.2003, Kleiner Bund)

Sprachlandschaft Bärndütsch

Bärndütsch gits scho, we me nid meint, alli Bärner müessi glych rede. Dr Rudolf Hotzenköcherle het i sym Buech "Die Sprachlandschaften der deutschen Schweiz" d Gränze vom Bärndütsche beschribe. Es git nid ei Gränze, nei, grad föife, u die föife gö nid genau an glychen Ort düre. (Dütsch-Fryburg u dr Buechibärg ghöre meistens o zur Landschaft Bärndütsch, ds Oberhasli mängisch nid.) Dr Profässar Paul Zinsli het gschribe: "Berndeutsch ist ein strahlungskräftiger Kernpunkt eines mehr oder weniger geschlossenen südwestdeutschen Sprachraums."

Mir Bärner säge

Emanuel Friedli: Berndeutsch als Spiegel bernischen Volkstums

A der Chilchemuur vo Lützelflüh het s drü Greber noch binenand: Albert Bitzius (Jeremias Gotthelf), Simon Gfeller u Emanuel Friedli. Die drei hei vil ta für ds Bärndütsch u die bärnischi Volkskultur. Bärndütsch gschribe het aber numen eine, dr Simon Gfeller, Lehrer uf der Egg. (Churzi Biographie hie.)

Dr Pfarrer Emanuel Friedli isch am 14. Chrischtmonet 1846 i dr Gmein Lützelflüh als Bueb vom ene muusarme Wäber gebore u vom Jeremias Gotthelf touft worde. Acht längi Jahr (1856 bis 1864) lang het er i der Armenerziehigsanstalt Trachselwald glitte u gleert Strümpf lisme. Will er alls gläse het, wo n er chönne, het men ihm "Büecher-Friedli" gseit. (Über sy Lydenszyt het er nüt gschribe, drfür umso scherfer der Carl Albert Loosli i sym Buech "Anstaltsleben - Betrachtungen und Gedanken eines ehemaligen Anstaltszöglings", veröffentlecht vom Fritz Schwarz im "Pestalozzi-Fellenberg-Haus" - dr Loosli u dr Fritz Schwarz chöme bed o schüsch no uf myne Syte vor.)

Wi so mänge gschyde, arme Bueb vom Land isch er im Seminar Münchenbuchsee (1864 bis 1867) Lehrer worde u het nachär im Rüegsauschachen, z Enggistein, z Wattenwil bei Worb u schliesslech z Ostermundigen Schuel ggä. Im Jahr 1884 het er d Matur gmacht u z Bern u z Genf Theologie u öppis Germanistik studiert. 1880 isch er Pfarrer worde.

Im Jahr 1881 isch er als Pfarrer uf Innertkirchen gwäält worde, 1884 uf Gottstadt bei Orpund. Dört isch es zu n ere schwäre familiäre, persönlech u bruefleche Krise cho. Sy Eh isch 1895 gschide worden u wird 1896 "natürlech" nümme gwählt. Er het zur Behandlig wöllen i d Irrenanstalt Münsigen yträtte - du fingt er Fründe, won im e Stell bim "Schweizerischen Idiotikon", em schwyzerdütsche Wörterbuech vermittlet hei. Dört macht är Plän für öppis ganz Nöis: A eim Ort Wörter z sammle, se beschrybe u se nid nach em Alphabet, sondern nach Theme z ordne. U de chunnt er ume uf Lützelflüh hei..

"Ich bin mein eigener Sohn. 56jährig kam ich auf die Welt in der Erzieherfamilie Simon Gfeller uf der Egg bi Lützelflüh." Ghulfe bi der Wiedergeburt hei dr Simon Gfeller, Lehrer u Schriftsteller (won er bin ihm gwohnt het), dr Profässer für Dütsch a dr Uni Bern, Otto von Greyerz, dr Verleger Alexander Francke ( e Norddütsche), dr Regierigsrat Dr. Gobat (e Wälschjurassier) u dr Maler Rudolf Müller.